Rehabilitering ved alvorlig perifer nervesykdom

Du utarbeider måla dine i samarbeid med det tverrfaglege teamet ditt i første fase av rehabiliteringa. Det kan også vere aktuelt å involvere pårørande dine i arbeidet.

Dersom det er vanskeleg å formulere mål, vil vi hjelpe deg med å konkretisere dei meir for deg. Som ei hjelp i å skape presise målsettingar nyttar vi ofte akronymet SMART som ei huskehjelp til å passe på at målet blir så presist som mogleg.

S – spesifikt

M – målbart

A – akseptert eller aktivitetsretta

R – realistisk og

T – tidsavgrensa

Ein viktig motivasjonsfaktor for måloppnåing er at du sjølv har tru på at det er mogleg å nå målet og at du er motivet for å oppnå måla. Det tverrfaglege teamet ditt vil så langt som mogleg hjelpe til i å engasjere deg og legge til rette for at måloppnåing skal bli mogleg.

Viktige ting å ta omsyn til i formuleringa av mål kan vere:

• Personlege faktorar som personlegdom, interesser, meistringsevne, alder, skole-/yrkessituasjon og så vidare.
• Symptombildet som tar omsyn til utfall, symptom og endringar etter aktuell skade/sjukdom.

Tidsaspektet for eksempel kor du er i rehabiliteringsforløpet. Tidleg i forløpet kan endringar skje raskt og det kan vere nødvendig å endre måla hyppigare.  

Det vil bli halde jamlege målmøte mellom deg, pårørande dine og det tverrfaglege teamet ditt når det er aktuelt i løpet av opphaldet.

For å kunne gi eit rehabiliteringstilbod som er individualisert og retta mot behova og måla dine, blir det gjennomført det ei kartlegging. Det inneber samtalar, testar og observasjonar.

Kartlegginga og rehabiliteringa rettar seg mot desse områda:

• bevisstheitsnivå
• smerte
• språk og kommunikasjon
• medisinske forhold
• motorisk funksjon
• kognitiv funksjon
• ernæring
• sosiale og miljømessige faktorar
• arbeid, utdanning og deltaking

Rehabiliteringsprosessen er basert på mål du set for deg sjølv saman med det tverrfaglege rehabiliteringsteamet. Eit tverrfagleg team leidd av behandlingsansvarleg lege samarbeider med deg og dine pårørande i rehabiliteringsprosessen. Ein teamkoordinator koordinerer rehabiliteringa, og sikrar samhandling internt i sjukehuset og med eventuelle eksterne samarbeidspartnarar. Har du behov for, og ønsker sjølv, ein individuell plan (IP) og/eller koordinator, etablerer vi kontakt med koordinerande eining og koordinator i heimkommunen din.

Har du behov for oppfølging frå kommunale helsetenester opprettar vi tidleg kontakt med heimkommunen din og eventuelt inviterer til dialogmøte for å sikre deg ei god overføring til heimen. Du får ein individuelt tilpassa timeplan med terapitimar og aktivitetar/avtaler kvar veke. Saman med deg definerer vi rehabiliteringsmål, som blir dokumentert i ein målplan. Det blir arrangert målmøte for å sikre framgang i rehabiliteringsprosessen. Pårørande kan delta på møte dersom du ønsker det.

Rehabiliteringa baserer seg på kunnskapsbasert praksis. Det vil seie at rehabiliteringa tar utgangspunkt i oppdatert forsking, erfaring hos rehabiliteringsteamet og dine eigne og andre pasientars erfaringar.

Heilskapleg rehabilitering føreset ei tverrfagleg tilnærming der ei rekke ulike fagpersonar bidrar til å klargjere og betre livssituasjonen din.

Eit tverrfagleg team kan bestå av lege, fysioterapeut, ergoterapeut, sosionom, sjukepleiar, helsefagarbeidar, psykolog, teamkoordinator og logoped/pedagog.

Heilskapleg rehabilitering er opptatt av den totale livssituasjonen din, og korleis fysiske og kognitive følger av sjukdom eller skade påverkar livskvaliteten din og rollene du har i livet.

Eigeninnsatsen din i rehabiliteringa er svært viktig. Under opphaldet trenar du på alle daglege gjeremål. Du trenar på å vinne tilbake funksjonar i aktivitetane til dagleglivet. Treninga begynner med ein gong, og går frå du føre seg vaknar om morgonen til du legg deg om kvelden. Timeplanen speglar målplanen din, og synleggjer betydninga av balanse mellom aktivitet og kvile.

I starten vil vi saman finne ut kva du bør prioritere. Dine eigne mål og resultata frå kartlegginga vil vere førande for vidare tiltak og rehabilitering under opphaldet.

Rehabiliteringa går føre seg individuelt og i grupper. Dagane blir individuelt tilpassa kapasiteten din og behova dine.

Under opphaldet og før du reiser heim kan det bli forandringar med omsyn til kva medisinar du skal bruke. Før utreise vil du få ei oppdatert legemiddelliste og informasjon frå legen ved avdelinga om kva medisinar du skal bruke. Eventuelle reseptar blir sende elektronisk til apotek.

Tenesta «Mine resepter» på Helsenorge gir deg som har fått e-reseptar oversikt over

• dei aktive reseptane dine
• legemiddel du har fått utlevert på apotek
• talet på utleveringar som er gjorde

Før heimreise bør du har oversikt over

• om dei nye medisinane dine påverkar evna til å køyre bil eller arbeid med farleg utstyr
• kven du skal kontakte dersom du har spørsmål om behandlinga
• om du skal ha noka oppfølging av helsetenesta etter utskrivinga

Det er ulike rehabiliteringstilbod og tenester i kommunane. Koordinerande eining eller tenestekontoret i kommunen din kan gi deg informasjon om dette. Vi kan hjelpe deg i å komme i kontakt med aktuelle lokale tenester.

På Helsenorge kan du finne generell informasjon om kommunale hjelpetilbod

Det finst også rehabiliteringstilbod ved private rehabiliteringsinstitusjonar som har avtale med dei regionale helseføretaka. Du kan finne meir informasjon om det på nettsidene til dei regionale koordinerande einingane i landet eller ringe den nasjonale rehabiliteringstelefonen 800 300 61.

Du kan også søke på rehabiliteringstilbod på tenesta Velg behandlingssted på helsenorge.no.